Period: 14th
Source:
Electronic version prepared by Mark Butler E, David Schneider C, and Thomas J. Mathiesen A for the Thesaurus Musicarum Latinarum, 2002.
[15][D]E SEMIBREVIBUS
Quandocunque due semibreves ponuntur pro tempore, si prima semibrevis caudatur habet duas partes temporis, secunda habet terciam. Si vero tres fuerint et prima sit caudata, tunc ipsa habet terciam partem temporis et medietatem tercie, secunda habet medietatem tercie, ultima habet terciam. Si vero caudata fuerit in medio, tunc prima habet medietatem tercie partis temporis, caudata terciam et medietatem tercie, ultima habet terciam. Si vero caudata fuerit in fine, tunc prima semibrevis habet terciam partem temporis, secunda medietatem tercie, ultima habet terciam et medietatem tercie. Si vero fuerint quatuor, tunc caudata habet terciam et medietatem tercie, secunda medietatem tercie, et quelibet duarum habet medietatem tercie, sive ponatur caudata in principio vel in medio sive in fine. Si vero sint quinque, tunc caudata ubicunque ponatur habet terciam partem, et quelibet reliquarum habet medietatem tercie.
[S]i vero cantus cantetur de inperfectis, tunc semibrevis que caudatur, si sint due, valet [tres] partes temporis, et alia valet quartam partem. Si vero sint tres, tunc illa que caudatur habet duas partes temporis, et quelibet sequencium habet quartam partem, quia tunc dividitur in quatuor partes equales.